Sautján keppendur frá UÍA taka þátt í unglingalandsmóti UMFÍ sem hófst í Þorlákshöfn í morgun.
Hrafn Guðlaugsson, kylfingur, var fyrstur af stað af keppendum UÍA en hann hóf leik klukkan átta í morgun. Í dag verður að auki keppt í frjálsum íþróttum og fótbolta. UÍA sendir einnig keppendur í glímu og sundi en þær greinar hefjast á morgun. Nokkrir foreldrar eru með í för enda mótið fjölskylduhátíð. Lovísa Hreinsdóttir þjálfar frjálsíþróttahópinn og Stefán Bogi Sveinsson, framkvæmdastjóri UÍA, verður við setningarathöfnina í kvöld. Mótinu lýkur á sunnudag en hægt er að fylgjast með á www.ulm.is.
Keppendur frá UÍA unnu til fjölda verðlauna á Sumarleikum HSÞ sem fram fóru um helgina. Einn keppandi komst með árangri sínum í úrvalshóp FRÍ.
Þrír keppendur frá UÍA kepptu á leikunum, þeir Brynjar Gauti Snorrason, Atli Pálmar Snorrason og Bjarmi Hreinsson, allir frá Egilsstöðum.
Brynjar, sem keppti í flokki sveina 15-16 ára, vann til gullverðlauna í spjótkasti og 1500 metra hlaupi, silfurverðlauna í kúluvarpi og bronsverðlauna í kringlukasti og 800 metra hlaupi.
Bjarmi, sem einnig keppti í sveinaflokki, sigraði í bæði kúluvarpi og sleggjukasti. Hann kastaði sleggjunni 44,48 metra og komst með því inn í úrvalshóp FRÍ í greininni.
Við hjá UÍA erum stolt af árangri drengjanna og búumst við miklu af þeim í framtíðinni.
<p><em>Uppfærð staða í Malarvinnslubikarnum og leikskýrslur þær sem hafa borist verða birtar á heimasíðunni á morgun.</em></p>
<p>Þetta hefur tafist hjá skrifstofunni sökum anna, tilrauna til að koma upp sérstöku tölvukerfi til að halda utan um deildina og kærumála sem ekki höfðu verið til lykta leidd.</p><p>Líklega tekst ekki að koma tölvukerfinu í gagnið og þetta verður því fært inn handvirkt hér á síðuna. Ég minni félögin eindregið á að skila rétt útfylltum skýrslum til skrifstofu svo fljótt sem verða má.</p><p>Vonandi eru byrjunarörðugleikar í mótinu að baki og hægt að halda áfram að skemmta sér við að spila fótbolta.</p>
<p><em>Allnokkrir leikir hafa verið leiknir í Malarvinnslubikarnum undanfarnar tvær vikur.</em></p>
<p>Sjötta umferð keppninnar var leikin sunnudaginn 20. júlí. KR-ingar gerðu góða ferð suður í Hornafjörð og unnu heimamenn í Dynamó Höfn 2-0.</p><p>Ferð Þristar til Borgarfjarðar var sömuleiðis ferð til fjár en þeir unnu góðan 2-1 sigur á heimamönnum. UMFB átti ívið meira í leiknum en það eru jú mörkin sem telja.</p><p>Síðasti leikur umferðarinnar var á Seyðisfirði en þar höfðu gestirnir í BN ´96 sigur gegn liði 06. apríl 1-3. Alir leikir umferðarinnar unnust því á útivelli.</p><p>Sjöunda umferðin fór fram um liðna helgi. BN ´96 gerði góða ferð á Fellavöll og unnu stórsigur á Þristarmönnum 2-6.</p><p>Á Seyðisfirði gerðu KR og 06. apríl 1-1 jafntefli í hörkuleik.</p><p>Leikur UMFB og Dynamó Hafnar sem fram fór á Borgarfirði var flautaður af undir lok fyrri hálfleiks eftir að leikmaður gestana veittist að dómara með höggum. Staðan þegar leikurinn var flautaður af var 7-3 heimamönnum í vil. UÍA lítur málið vitaskuld mjög alvarlegum augum og er með það til skoðunar hvaða viðurlögum verður beitt og hver úrslit leiksins verða. Verður tilkynnt innan tíðar hver niðurstaða málsins verður.</p><p>Til viðbótar við þetta var einum leik í 8. umferð keppninnar flýtt um viku. KR-ingar tóku á móti Þristi og unnu 1-0 sigur.</p><p>Eins og fram hefur komið er var stöðusíða Malarvinnslubikarsins hökkuð af óprúttnum aðilum. Unnið er að því að setja hana upp að nýju og vonandi verður hún komin í gagnið sem allra fyrst.</p>
<p><em>Heil umferð var leikin í Malarvinnslubikarnum á sunnudag. Keppnin er æsispennandi.</em></p>
<p>Á Fellavelli tóku Þristarmenn á móti langt að komnum liðsmönnum Dýnamó. Gestrisnin var ekki í hávegum höfð og höfðu heimamenn sigur 3-1.</p><p>UMFB lék sinn fyrsta heimaleik á tímabilinu, enda nú búið að heyja heimavöll þeirra. Höfðu þeir baráttusigur gegn 06. apríl 3-2.</p><p>Í Fjarðabyggðarhöllinni léku heimamenn í KR gegn grönnum sínum í BN ´96. Norðfirðingarnir gerðu góða ferð þangað og unnu stórsigur 2-5.</p><p>Malarvinnslubikarinn er æsispennandi í ár. Stöðuna í deildinni má sjá með því að smella á hlekkinn Malarvinnslubikarinn 2008 hér vinstra megin á síðunni.</p>
<p><em>Heil umferð var leikin í Malarvinnslubikarnum í gær. Nokkur óvænt úrslit litu dagsins ljós.</em></p>
<p>Í Fjarðabyggðarhöllinni tók KR á móti UMFB. Fóru leikar svo að gestirnir höfðu sigur, 2-4. Skúli Andrésson skoraði þrennu fyrir gestina og hefur nú skorað fimm mörk í tveimur leikjum fyrir Borgfirðinga.</p><p>Á Fellavelli áttust við lið Þristar og 06. apríl. Þar höfðu heimamenn 3-2 sigur.</p><p>Í Hornafirði tóku heimamenn í Dýnamó á móti BN ´96 og höfðu 3-2 sigur.</p><p>Staðan í keppninni verður birt á vefnum á morgun.</p>
<em>Heimasíða Malarvinnslubikarsins hefur verið hökkuð.</em>
Í stað stöðunnar birtast skilaboð á tyrknesku. Þrátt fyrir tilraunir tókst ekki að þýða annað orð en „ást“ í skilaboðunum. Unnið er að viðgerð á kerfinu.<br />Einn leikur verður í keppninni í kvöld, UMFB tekur á móti BN.
UÍA heldur þessa dagana á Egilsstöðum einn af Frjálsíþróttaskólum UMFÍ. Þar eru saman komnir 15 krakkar alls staðar af á landinu við æfingar á hinum ýmsu greinum frjálsra íþrótta.
Hópurinn unir sér vel undir leiðsögn Ólafs Björnssonar yfirþjálfara en hann heldur utan um hópinn á æfingum og í hinum ýmsu viðburðum. Á dagskránni auk frjálsíþróttaæfinga eru gönguferðir, leikir, spil, pool, borðtennis, sund, óvissferð og ýmislegt fleira.
Á æfingunum er farið yfir allar helstu greinar frjálsra íþrótta, krakkarnir frædd um grundvallaratriði að baki árangri í greinunum og tæknin kennd. Á síðari æfingu dagsins í dag fengum við góða gesti. Það voru þeir Einar Hróbjartur Jónsson spjótkastari og Hreinn Halldórsson, fyrrverandi Evrópumeistari í kúluvarpi. Kenndu þeir krökkunum tökin á kastgreinunum. Hér fyrir neðan má sjá myndir af því.
Skólanum lýkur á föstudagsmorgun með frjálsíþróttamóti þar sem krakkarnir keppa í sínum eftirlætisgreinum. Áhugasamir eru hvattir til að kíkja við á Vilhjálmsvelli og sjá hvernig þeim tekst til.
Nýr formaður var kjörinn á aðalfundi Hugins á Seyðisfirði sem fram fór á mánudag.
Jóhann Hansson sem verið hefur formaður félagsins um áraraðir og setið í stjórn félagsins í 37 ár, lét af störfum og er óhætt að segja að um sé að ræða tímamót hjá félaginu. Jóhann sat að auki í stjórn UÍA í 13 ár og eru honum þökkuð kærlega mikil og góð störf í þágu ungmennafélagshreyfingarinnar.
Margrét Vera Knútsdóttir var kjörin nýr formaður Hugins en auk hennar var kjörin ný aðalstjórn.
UÍA óskar nýrri stjórn og formanni velfarnaðar í störfum sínum og vonast eftir ánægjulegu samstarfi.
