Huginn og Fjarðabyggð áfram

Skrifað af Ritstjórn þann 20. maí 2005.

Tveir leikir fóru fram í 32ja liða úrslitum Visa bikars karla í gærkvöldi. Fjarðabyggð mætti Knattspyrnufélagi Eskifjarðar á malarvellinum á Neskaupsstað og Huginn tók á móti Leikni Fáskrúðsfirði á Seyðisfjarðarvelli. Mikið var skorað í báðum leikjum.

Fjarðabyggð sigraði Knattspyrnufélag Eskifjarðar á malarvellinum á Neskaupstað. Leikurinn fór 4-1 en því miður erum við ekki með markaskorara leiksins á hreinu, bætum úr því þegar þær upplýsingar koma í hús.

Huginn sigraði Leikni á Seyðisfjarðarvelli. Það var Andri Bergmann sem skoraði fyrsta markið á 11. mínútu, þá bætti Tómas Arnar við öðru rétt fyrir hálfleik. Í seinni hálfleik, á 47. mínútu, setti Andri Bergmann sitt annað mark. Á 52. mínútu minnkaði dýrasti leikmaður Ísland, Almir Kosic, metin og staðan því 3-1. Stuttu seinna minnkaði þjálfari gestanna, Vilberg Jónasson, metin enn frekar og staðan því orðin 3-2 og leikurinn galopinn. Það var síðan Þórarinn Máni Borgþórsson sem gerði út um leikinn og skoraði glæsilegt mark af 25-30m færi, upp í þaknetið á 79. mín. Staðan 4-2 og þannig fóru leikar.

Það eru því Fjarðabyggð og Huginn sem fara áfram í næstu umferð. Fjarðabyggð mætir annað hvort Neista eða Boltafélagi Djúpavogs sem mætast í kvöld. Huginn mætir hins vegar Hetti sem sigraði Sindra 1-0.

Kaaber kaffihúsamót Þristar

Skrifað af Ritstjórn þann 03. maí 2005.

Í flokki fullorðinna sigraði Sigurður Arnarson með 6 vinninga og var þetta í fjórða sinn sem hann hampar titlinum. Í öðru sæti varð Viðar Jónsson með 5 og 1/2 vinning og Sverrir Gestsson varð þriðji með 5 vinninga.

Í flokki yngri keppenda bar Bjarni Jens Kristinsson sigur úr býtum þriðja árið í röð en hann náði 4 vinningum. Í 2.-5. sæti urðu jafnir með þrjá vinninga Sigurður Max Jónsson, Ingimar Jóhannsson, Garðar Örn Garðarsson og Sigurður Árni Sigurbjörnsson og þurftu þeir að tefla innbyrðis um verðlaunasætin. Sigurður Max varð hlutskarpastur og hreppti annað sætið og Ingimar það þriðja. Aðeins ein stelpa tók þátt í mótinu, Emma Líf Jonsdóttir úr þriðja bekk Hallormsstaðaskóla.

Höttur sigrar Sindra

Skrifað af Ritstjórn þann 18. maí 2005.

Höttur sigraði Sindra í fyrsta leik 32ja liða úrslitum Visa bikars karla á Sindravöllum, Hornafirði í gærkvöldi með einu marki gegn engu. Höttur er því komið áfram í næstu umferð bikarkeppninnar.

Það var hinn 15 ára gamli unglingalandsliðsmaður Högni Helgason sem skoraði eina mark leiksins á upphafsmínútunum aðeins gegn gangi leiksins. Eftir þetta fóru Hattarmenn að taka völdin a vellinum og gáfust nokkur færi á að bæta við mörkum en allt kom fyrir ekki. Síðari hálfleikurinn einkenndist af sterkri varnarvinnu og lítið var um færi og úrslitin því 0-1 gestunum í vil og þeir komnir áfram í Visa bikarnum. Höttur mætir svo annaðhvort Huginn eða Leikni sem mætast á morgun fimmtudag og verður leikurinn leikinn á Seyðisfirði. Einnig mætast Fjarðabyggð og Knattspyrnufélag Eskifjarðar í Fjarðabyggð. Á föstudag eru það svo Neisti og Boltafélag Norðfjarðar sem mætast á Djúpavogi.

Sambandsþingi lokið

Skrifað af Ritstjórn þann 27. apríl 2005.

Íslandsmót í knattspyrnu hafið

Skrifað af Ritstjórn þann 17. maí 2005.

Tvö lið að austan hófu keppni sína á Íslandsmótinu í knattspyrnu í gærdag. Fjarðabyggð tók á móti Stjörnunni á malarvellinum á Neskaupstað og Huginn sótti Aftureldingu heim og var leikurinn spilaður á Tungubökkum. Í kjölfarið hefst svo keppni í Visa bikar karla þar sem austan liðin eru að sjálfsögðu með. Einn leikur er í kvöld, tveir á fimmtudag og sá siðasti á föstudag. Við hvetjum fólk til að vera duglegt að mæta á völlinn og standa við bakið á sínu liði!

Í leiknum á Neskaupstað voru leikmenn Fjarðabyggðar fyrri til að skora og var þar að verki Grétar Örn Ómarsson sem setti boltann í stöng og inn eftir mistök í vörn Stjörnumanna. Það var svo í síðari hálfleik sem Stjarnan náði að jafna metin, og var það Goran Lukic sem það gerði eftir aukaspyrnu Dragoslav Stojanovic. 1-1 og þar við sat.

Á Tungubökkum voru það Huginsmenn sem komust yfir eftir um 20 mínútna leik þegar Andri Bergmann var felldur innan teigs af markamanni Aftureldingar. Hann tók vítið sjálfur og skoraði af miklu öryggi. Afturelding jafnaði metin skömmu seinna eftir hornspyrnu og var það Magnús Edvardsson sem skoraði með skalla. Á 52. mínútu komust Huginsmenn aftur yfir eftir slæm mistök í vörn Aftureldingar og var það Sveinbjörn Jónasson sem nýtti sér það og setti boltann framhjá markverði gestgjafanna. Fljótlega eftir þetta fékk Birkir Pálsson, fyrirliði Hugins, að líta rauða spjaldið eftir brot á Sævari Frey Alexanderssyni. Við þetta virtust leikmenn Hugins eflast og skömmu síðar skoraði Tómas Arnar Emilsson eftir góðan undirbúning Huginsmanna. Staðan orðin 1-3 og urðu það úrslit leiksins.

Í kvöld hefjast svo 32ja liða úrslit í Visa bikar karla þar sem Höttur heimsækir Sinda á Sindravelli á Hornafirði. Á fimmtudaginn tekur Huginn á móti Leikni á Seyðisfirði og Fjarðabyggð leikur við Knattspyrnufélag Eskifjarðar á Neskaupstað. Fyrstu umferðinni í Visa bikarnum lýkur svo hér fyrir austan á föstudaginn með leik Neista og Boltafélags Norðfjarðar á Djúpavogi.

Sambandsþing UÍA

Skrifað af Ritstjórn þann 20. apríl 2005.