Dugnaðarforkar heiðraðir á sambandsþingi UÍA
64. Sambandsþing UÍA fór fram á Djúpavogi síðastliðinn sunnudag, að vanda voru þar veitt ýmis heiðursmerki fyrir ötult starf í þágu æskulýðs og íþróttamála í fjórðungnum.
Starfsmerki UÍA hlutu tvær Neistakonur þær:
Kristborg Ásta Reynisdóttir sem sat fjölmörgi ár í stjórn, mætir á alla viðburði og er ávallt fyrst að bjóða fram aðstoð.
Klara Bjarnadóttir sem sat samfell í 6 ár í stjórn, og hefur starfað í sund- og yngriflokkaráði félagsins. Mætir á alla viðburði og hefur ávallt verið tilbúin til að hjálpa þegar þess hefur verið þörf.
Hrönn Jónsdóttir fulltrúi UMFÍ veitti starfsmerki UMFÍ fyrir kröftugt starf í þágu hreyfingarinnar og það hlaut Andrés Skúlason, Neista. Andrés sat í stjórn Neista í fjölda ára fyrir aldamót, var formaður í kringum aldamótin síðustu, hættir þar um 2002.
Hefur síðan þá alltaf verið á hliðarlínunni og hlúir vel að starfi ungmennafélagsins í gegnum störf sín sem oddviti og forstöðumaður íþróttamiðstöðvar Djúpavogs.
Hann er ávallt tilbúinn til að taka þátt í og hjálpa til við ýmsa viðburði á vegum félagsins.
Albert Jensson, Neista var sæmdur silfurmerki ÍSÍ en Viðar Sigurjónsson fulltrúi ÍSÍ afhenti það.
Albert hefur um árabil verið virkur í starfi Neista, hann ýmist þjálfaði eða var í stjórn (stundum bæði) meistaraflokks Neista frá 1993 þar til hann var lagður niður (2007).
Auk þess sem Albert hefur séð um þjálfun yngri flokka Neista í fótbolta að miklu leiti síðan árið 1993 og setið í stjórn félagsins í fjölda ára.
Albert kennir sund og á stórann þátt í velgengni sunddeildar Neista sem hefur unnið hvern bikararinn á fætur öðrum undanfarin ár.
Hann þjálfar núna yngriflokk sonar síns hjá Fjarðarbyggð og keyrir á æfingar á Reyðarfirði 1-2 í viku þar sem ekki næst í lið á Djúpavogi.
