Kvennalið Þróttar komið í annað sætið
Kvennalið Þróttar í blaki er komið í annað sæti úrvalsdeildar kvenna eftir að hafa lagt KA um helgina en karlaliðið tapaði sínum leikjum. Höttur tekur á móti Þór í fyrstu deild karla í körfuknattleik í kvöld.
Til stóð að leika bæði í Neskaupstað og á Egilsstöðum á föstudagskvöld en þeim leikjum var öllum frestað vegna ófærðar á Möðrudalsöræfum.
Á laugardagsmorgun var hins vegar rutt og komst lið KA austur í Neskaupstað á laugardag en leikið var aftur á sunnudagsmorgun.
Liðin skiptu með sér sigrunum þannig að KA vann báða karlaleikina, þann fyrri 2-3 (19-25, 25-22, 25-20, 20-25 og 13-15) og þann seinni 1-3 (23-25, 28-30, 25-22 og 23-25).
Þróttur vann hins vegar báða kvennaleikina 3-0 (25-16, 25-7, 25,18 og 25-21, 25-15, 25-12).
Þrátt fyrir að spilað væri á sunnudagsmorgni komust KA-liðin ekki norður í gær. Beðið var eftir mokstri á morgun með þann vara möguleika að keyra suðurleiðina.
Með sigrinum komst kvennaliðið upp í annað sætið, tveimur stigum á undan HK sem á leik til góða. Karlaliðið er einnig í öðru sæti en með eins stigs forskot á Stjörnuna sem einnig leik inni.
