Sjö lið kepptu á Vetrarleikum Blæs síðastliðinn laugardag

Skrifað af Ritstjórn þann 31. janúar 2014.

Mótastarf Hestamannafélagsins Blæs hófst síðustu helgi þegar fyrsta mót í mótaröðinni Vetrarleikar Blæs 2014 var haldið í Dalahöllinni á Norðfirði. Vetrarleikarnir eru liðakeppni þar sem að þrír knapar skipa liðið en knaparnir safna einnig stigum í einstaklingskeppni.

Þátttakan var afar góð og mótið heppnaðist mjög vel. Það voru sjö lið sem voru skráð til leiks með tuttugu og einn knapa sem kepptu í fjórgangi. Fimm stigahæstu knaparnir riðu í úrslitum og þar sigraði Laufey Sigurðardóttir á Röst frá efri Miðbæ með 24 stig.

Eftir þetta fyrsta mót standa stigin fyrir þrjú efstu liðin svona:

Hestar og menn 2014 48,5

Miðbær 47,5

Tjarnarland 46,5

Næsta mót í röðinni verður haldið 8. mars og verður þá keppt í smala.

Kvennatölt Blæs verður haldið í Dalahöllinni laugardaginn 8. febrúar næstkomandi kl. 14:00. Þar verður keppt í opnum flokki fyrir meira vanar og í opnum flokki fyrir minna vanar.