Höttur vann FSu síðasta föstudag

Skrifað af Ritstjórn þann 28. janúar 2014.

Höttur vann mikilvægan sigur í baráttunni um efstu sæti fyrstu deildar karla í körfuknattleik þegar liðið lagði FSu 94-98 á Selfossi sl. föstudag. Liðin skiptust á um að hafa forustuna í leiknum.

Það voru heimamenn sem byrjuðu betur og leiddu 28-20 eftir fyrsta leikhluta en liðið náði mest ellefu stiga forskot í leikhlutanum.

Höttur snéri leiknum fljótt sér í vil, skoraði ellefu fyrstu stigin í öðrum leikhluta og var 28-31 yfir þegar tvær mínútur voru búnar af honum. Heimamenn tóku þá leikhlé og eftir það jafnaðist leikurinn. Höttur var samt yfir í hálfleik, 47-53.

Aftur snérist taflið við í þriðja leikhluta en FSu komst yfir 70-68 með tveimur vítaskotum í lok hans. Þeir höfðu síðan frumkvæðið, 4-5 stiga forskot, fyrri hluta loka fjórðungsins.

Þegar tæpar þrjár mínútur voru eftir komst Höttur loks yfir, 85-87. Þá forustu lét liðið ekki af hendi og þriggja stiga karfa Geralds Robinsons þegar tæp mínúta var eftir færði liðinu fimm stiga forskot, 89-94, sem það hélt til loka.

Viðar Örn Hafsteinsson, þjálfari Hattar, segir sigurinn hafa verið mikilvægan en liðið berst um heimaleikjarétt í úrslitakeppninni í vor, meðal annars við FSu.

„Heilt yfir var spilamennskan góð. Varnarleikurinn er enn of sveiflukenndur og það þurfum við að lagfæra. Mér finnst liðið á réttri leið. Það er enn mikið eftir af mótinu og við keppumst við að hala inn stig og ætlum að styrkja okkur með hverri vikunni fram á voru."

Gerald Robinson skoraði 37 stig fyrir Hött og tók 8 fráköst. Austin Bracey skoraði 27 stig og sendi 10 stoðsendingar. Eysteinn Bjarni Ævarsson skoraði 11 stig og Hreinn Gunnar Birgisson tíu auk þess að hirða átta fráköst.

Höttur tekur næst á móti Fjölni en liðin mætast á Egilsstöðum á föstudagskvöld.