Hreyfivika á Seyðisfirði
Seyðfirðingar láta ekki sitt eftir liggja í evrópsku hreyfivikunni sem hefst á morgun og bjóða upp á veglega dagskrá.
Meðal þess sem í boði verður á Seyðisfirði verður dans í hádeginu í Herðubreið á morgun. Á miðvikudag verður opinnn tími í pæjupúli og í aðeins þetta eina sinn eru karlmenn velkomnir í tímann.
Verkefninu „út að hlaupa á Seyðis“ verður hleypt af stokkunum á þriðjudag. Markmiðið er að hver þátttakandi hlaupi eða gangi samanlagt 100 km fram að jólum í tilefni af 100 ára afmæli félagsins. Hópurinn safnast saman við íþróttahúsið Herðubreið þriðjudaga, fimmtudaga og laugardaga. Einnig er í boði að hjóla en þá þurfa menn að setja markið á 200 km.
Íþróttafélagið Viljinn lætur ekki sitt eftir liggja en í hádeginu á laugardag verður öllum boðið að grípa í bocciabolta á æfingu.
