Tour de Ormurinn haldinn í annað sinn
Hjólreiðakeppnin Tour de Ormurinn verður haldin í annað sinn laugardaginn 10. ágúst. Í keppninni verður hjólað umhverfis Lagarfljótið. Keppnisvegalengdirnar eru tvær, 68 km hringur og 103 km.
Keppt verður í flokkum karla og kvenna í báðum vegalengdum. Í þeirri styttri verður hægt að taka þátt í liðakeppni þar sem þrír einstaklingar keppa saman.
Keppnin var haldin í fyrsta skipti í fyrra. Halldór G. Halldórsson varð þá sigurvegari í styttri hringnum á 2:34,31 klst. en Unnsteinn Jónsson kom fyrstur í mark í 103 km hringnum á 4:02,31 klst.
Ræst verður kl. 9:00 á laugardagsmorgun við bílastæðið hjá Mörkinni í Hallormsstaðarskógi og hjólað út í Egilsstaði og upp Fell. Í styttri hringnum er beygt yfir Jökuls á í Fljótsdal neðan við Hengifoss en í lengri hringnum er haldið áfram alla leið inn í dalbotn í Fljótsdal.
Hringnum er síðan lokað þar sem hann hófst í Hallormsstaðarskógi. Búist er við fyrstu keppendum í 68 km hringnum eftir rúma tvo klukkutíma en eftir tæpa fjóra tíma úr lengri hringnum.
Það eru Austurför, UÍA og sveitarfélagið Fljótsdalshérað sem standa að keppninni. Skráning og nánari upplýsingar eru á www.traveleast.is eða á Facebook.
