Glæsileg afmælisveisla í tilefni 100 ára afmælis Hugins: Myndir
Seyðfirðingar og gestir þeirra fögnuðu 100 ára afmæli Íþróttafélagsins Hugins með tveggja daga hátíðahöldum um síðustu helgi.
Hátíðadagskrá var í miðbænum á föstudag. Við það tilefni var Rúnar Freyr Þórhallsson útnefndur íþróttamaður Hugins fyrir árið 2012 en hann leikur með meistaraflokki félagsins í knattspyrnu. Hann á einnig fínan feril að baki í fleiri íþróttagreinum, svo sem skíðum.
Ungmennafélag Íslands afhenti Ingibjörgu Svanbergsdóttur starfsmerki fyrir vel unnin störf í þágu félagsins og Þorvaldur Jóhannsson hlaut gullmerki Íþrótta- og Ólympíusambands Íslands.
Þorvaldur var einmitt kynnir á hátíðinni á föstudag auk þess sem hann var formaður ritnefndar sem gaf út glæsilegt afmælisblað.
Arnbjörn Sveindóttir, forseti bæjarstjórnar, flutti kveðju frá bæjarstjórninni og afhenti félaginu styrk upp á eina milljón króna.
Gunnar Gunnarsson, formaður UÍA, færði Jóhönnu Pálsdóttur, formanni Hugins, 100 ára sögu ÍSÍ að gjöf en bókin kom út í fyrra. Þá mætti Sprettur Sporlangi á svæðið við miklar vinsældir.
Hátíðahöldin héldu áfram á laugardag. Um morguninn var á dagskránni táknrænn gjörningur þar sem byrjað var að sprengja fyrir göngum undir Fjarðarheiði.
Í grunnskólanum var sýning á munum úr sögu félagsins og myndasýning sem aðgengileg er hér á YouTube.
Þá tók liðið á móti Leikni Fáskrúðsfirði í þriðju deild karla í knattspyrnu og vann 3-1. Með því komst liðið í efsta sæti deildarinnar um stundarsakir.
Um kvöldið var síðan hátíðarkvöldverður og skemmtun í Herðubreið sem um 500 manns sóttu.
