Grímur og Þóroddur fengu gullmerki ÍSÍ
Þóroddur Helgason Seljan og Grímur Magnússon voru sæmdir gullmerki Íþrótta- og Ólympíusambands Íslands í tengslum við þing UÍA í Neskaupstað á sunnudag fyrir störf sín í þágu íþróttahreyfingarinnar.
Þóroddur, sem fæddur er árið 1956, hefur þjálfað upp nokkrar kynslóðir glímumanna og er enn að. Hann var sæmdur gullmerki Glímusambands Íslands árið 2008 fyrir frábært starf í þágu glímunnar á Íslandi. Starfsmerki UÍA fékk hann árið 2011.
Grímur er fæddur árið 1950 og hefur starfað fyrir blakdeild Þróttar áratugum saman. Grímur er einn af „feðrum“ blaksins á Norðfirði, einni öflugustu blakdeild landsins.
Grímur hefur setið í nefndum og ráðum Blaksambandsins og verið dómari á vegum sambandsins um árabil.
Grímur er enn að, þjálfar, dæmir og hjálpar þar sem þess er þörf. Hann tók við orðunni þar sem hann var við störf á yngri flokka móti í blaki. Hann fékk starfsmerki UÍA árið 1987.
Hafsteinn Pálsson úr stjórn ÍSÍ kom fyrir hönd sambandsins á þingið og afhenti starfsmerkin.
