Ungt fólk og lýðræði hefst í dag
Lýðræðisráðstefnan Ungt fólk og lýðræði, sem fram fer í Valaskjálf á Egilsstöðum, hefst í dag. Von er á um sextíu þátttakendum á ráðstefnuna.
Þátttakendur koma af öllu landinu. Bæði koma þeir með flugi frá Reykjavík og rútu sem leggur af stað frá Akureyri en eins bætast heimamenn í hópinn. Hópurinn hittist í Valaskjálf klukkan átta í kvöld þar sem byrjað verður á samhristingi.
Formleg setning er klukkan tíu í fyrramálið. Sabína Steinunn Halldórsdóttir, ráðstefnustjóri, ávarpar ráðstefnuna fyrir hönd Ungmennafélags Íslands sem stendur að baki ráðstefnunni. Stefán Bogi Sveinsson, forseti bæjarstjórnar á Fljótsdalshéraði, tekur á móti gestum fyrir hönd sveitarfélagsins.
Samkvæmt heimildum uia.is er von á þriðja fyrirlesaranum með ávarp en ekki hefur fengist uppgefið hver það sé.
Að loknum ávörpum byrja fyrirlestar ráðstefnunnar. Þá flytja Margrét María Sigurðardóttir, umboðsmaður barna og Katrín Karlsdóttir, M.Sc. í skipulagsverkfræði og umhverfissálarfræði. Þema ráðstefnunnar í ár er ungt fólk og skipulag.
Eftir hádegi á morgun og á föstudagsmorgun verður unnið í vinnustofum. Dagskráin verður að auki brotin upp með kvöldvöku á fimmtudagskvöld og skoðunarferð um Egilsstaði seinni part fimmtudags.
Formleg kynningar á niðurstöðum ráðstefnunnar er klukkan 13:00 á föstudag. Þangað eru allir velkomnir.
