Páskaeggjamót í frjálsum á sunnudag
Páskaeggjamót UÍA og Fjarðasports í frjálsíþróttum fer fram í Neskaupstað á sunnudag. Mótið er fyrir ellefu ára og eldri.
Keppt verður í hástökki, langstökki án atrennu, þrístökki án atrennu, kúluvarpi og 100 m hlaupi í flokkum stráka og stelpna; 11 ára, 12-13 ára, 14-15 ára og 16 ára og eldri.
Keppendur í 6.-7. bekk geta fengið árangur sinn á mótinu skráðan og metinn inn í skólaþríþraut FRÍ. Keppendur safna stigum fyrir árangur í hverri grein sem lögð vera saman í lok móts. Stigahæsti keppandi í hverjum flokki fær stórt páskaegg í verðlaun.
Allir keppendur fá lítil páskaegg í viðurkenningarskyni fyrir þátttökuna. Heppnir þátttakendur fá útdráttarverðlaun. Frítt í sund fyrir keppendur að móti loknu.
Þátttökugjöld 500 kr. á keppenda óháð greinafjölda. Skráningar berist á netfangið This email address is being protected from spambots. You need JavaScript enabled to view it. eða í síma 471-1353 fyrir hádegi á laugardag, 16. mars. Keppni hefst klukkan 11:00 sunnudaginn 17. mars.
Við skráningu þarf að gefa upp: fullt nafn keppanda, fæðingarár, í hvaða greinum hann keppir og fyrir hvaða félag.
Allir velkomnir og ekki forsenda að hafa æft frjálsar íþróttir til að geta verið með.
