Eitt silfur og tvö brons á MÍ 15-22 ára
UÍA átti níu keppendur á Meistaramóti Íslands í frjálsum íþróttum 15-22 ára sem fram fór í Laugardalshöll um helgina. Þrenn verðlaun skiluðu sér í hús auk þess sem mikið var um bætingar hjá UÍA fólki.
Meðal afreka má nefna að Daði Fannar Sverrisson lenti í öðru sæti í kúluvarpi í flokki pilta 16-17 ára og Helga Jóna Svansdóttir varð í þriðja sæti í þrístökki 15 ára stúlkna auk þess sem hún komst í úrslit í 60 m hlaupi og 60 m grindahlaupi. Mikael Máni Freysson náði þriðja sæti í 1500 m hlaupi í flokki 15 ára pilta og komst í úrslit í þrístökki og 60 m. Þá komust Einar Bjarni Helgason og Atli Pálmar Snorrason í úrslit í langstökki 15 ára pilta.
Sumir voru að stíga sín fyrstu skref á frjálsþróttamótum auk þess sem þónokkuð var um bætingar eins og áður sagði. Það er því óhætt að segja að árangurinn á mótinu lofi mjög góðu fyrir sumarið þegar keppnistímabilið utan húss fer á fullt.
