Snæfell 2012 komið út
Nýjasta tölublaði Snæfells var dreift til Austfirðinga í vikunni. Þar kennir ýmissa grasa. Farið er yfir árið hjá UÍA í máli og myndum. Aðalviðtal blaðsins er við Rafn Heiðdal, fyrrverandi knattspyrnumann frá Djúpavogi.
Rafn var að verða tuttugu og þriggja ára, átti von á barni og nýbyrjaður að spila í fyrstu deildinni í knattspyrnu þegar hann greindist með krabbamein. Við tók löng og erfið meðferð við krabbameininu og síðan við alkóhólisma. Snæfell ræddi við Rafn um fisk og fótbolta á Djúpavogi, baráttuna við veikindin og löngunina til að hjálpa öðrum.
Af öðru efni má nefna viðtal við Helenu Kristínu Gunnarsdóttur, íþróttamann UÍA árið 2011 en hún söðlaði um á árinu, fór frá Þrótti Neskaupstað til Bandaríkjanna þar sem hún spilar blak með Lee Collage í Texas. Við ræðum einnig við Ólaf Tryggva Þorsteinsson og Höllu Helgadóttur, Unglingalandsmótsfara.
