Huginn Fellum 80 ára: Krakkarnir mæta fyrr í skólann til að geta spilað borðtennis

Skrifað af Ritstjórn þann 15. nóvember 2012.

Mikill áhugi er í Fellaskóla á borðtennis, svo mikill að sögun skólastjórans að krakkarnir mæta þar kortér í níu á morgnana til að byrja að spila. Haldið var upp á 80 ára afmæli Hugins í Fellum um síðustu helgi með borðtennismóti.

Slegið var saman í hátíðarhöld í kringum afmælið Hugins og Fellaskóla, sem varð 25 ára. Á fimmtudegi var keppt í skák, á föstudegi var haldið upp á afmæli skólans og á laugardag var borðtennismót.

Huginn hefur löngum hlúð að þessum greinum en það er einnig eina aðildarfélag UÍA þar sem skylmingar eru stundaðar.

Sverrir Gestsson, skólastjóri Fellaskóla, segir mikinn borðtennisáhuga í skólanum um þessar mundir. Spilað sé í öllum frímínútum og krakkarnir mæti jafnvel fyrr á morgnana til að leika sér.

Gunnar Gunnarsson, formaður UÍA, leit við á afmælinu, færði félaginu blómvönd í tilefni dagsins og tók þátt í borðtennismótinu.