Bólholtsbikarinn að bresta á
Keppni í Bólholtsbikarnum í körfuknattleik hefst innan skamms. Áhugasamir körfuknattleiksmenn á starfsvæði á Austurlandi tóku í hittifyrra höndum saman og efndu til utandeildarkeppni í körfuknattleik í samstarfi við UÍA og með fulltingi frá Bólholti. Keppnin hefur notið mikilla vinsælda og hefur því verið ákveðið blása að þriðja sinni til leiks í Bólholtsbikarnum.
Keppnin er ætluð hópum á starfssvæði UÍA og er hugsuð fyrir leikmenn sem ekki spila körfubolta að staðaldri með Meistaraflokki á Íslandsmótum. Leikið verður i umferðum og munu keppnislið spila bæði heima og heiman. Leiktími er 4x10 mínútur. Sigursælasta liðið í lok keppni hlýtur Bólholtsbikarinn en einnig verða veitt verðlaun fyrir stigakóng keppninnar. Ráðgert er að keppnin hefjist um miðjan október. En lið Sérdeildarinnar á Egilsstöðum hefur hampað tiltlinum í báðum fyrri keppnum og sannarlega kominn tími til að önnur lið velgi þeim duglega undir uggum.
Skráningarfrestur liða er til 8. október og skulu skráningar berast til UÍA, Tjarnarási 6, 700 Egilsstaðir eða á This email address is being protected from spambots. You need JavaScript enabled to view it.. Skráningargjöld ráðast af þátttökufjölda en þau eru ætluð til aðstanda straum af kostnað vegna dómgæslu.
Skráningareyðublöð má nálgast hér.
Eins og sjá má á skráningarblöðum eru liðin beðin að tilgreina heimavöll. Gerðar verða ákveðnar tilslakanir á stærðum keppnisvalla og kröfum um útbúnað (s.s. skotklukkur) en UÍA áskilur sér rétt til að hafna keppnisvöllum, þykir þeir óhentugir.
Lið eru beðin að tilgreina tvo dómara sem tiltækir geta verið í dómgæslu á heimaleikjum liðsins. Æskilegt er að dómari hafi dómararéttindi en að öðrum kosti sé nýttur traustur einstaklingur sem hefur góða þekkingu á íþróttinni. UÍA greiðir þóknun fyrir dómgæslu. Heimalið hverju sinni þarf einnig að útvega stigavörð og ritara.
Reglur keppninnar má sjá hér.
Liðum ber að leika í samlitum búningum með númeri en hvorki gerð krafa um að þeir séu dýrir né glæsilegir.
Fulltrúar liðanna mega eiga von á að vera boðaðir á fund skömmu eftir að skráningarfrestur rennur út þar sem reglur keppninnar verða ræddar og fyrirkomulag útfært nánar.
Á myndinni hér til hliðar má sjá ríkjandi meistara Bólholtsbikarsins, Sérdeildina.
