99 keppendur á Unglingalandsmóti
Níutíu og níu keppendur eru skráðir undir merkjum UÍA á Unglingalandsmót UMFÍ sem hefst á Selfossi á föstudag. Þetta er einn mesti fjöldi sem skráð hefur sig undir merkjum sambandsins á mótin.
Keppendurnir koma af öllu Austurlandi og á UÍA fulltrúa í flestum keppnisgreinum, þar með talið starfsgreinum sem er nýjasta keppnisgreinin. Mótið á Selfossi er hið fjölmennasta sem haldið hefur verið en alls eru um tvö þúsund þátttakendur skráðir.
Starfsmenn UÍA verða á svæðinu til að styðja við hópinn. Á tjaldsvæðinu verður tjald sem verður bækistöð Austfirðinga.
Búist er við þungri umferð á Selfoss á morgun og hefur þeim sem koma úr vesturátt verið bent á að fara Þrengslin. Flestir þeirra sem UÍA hefur rætt við stefna á að mæta á Selfoss annað kvöld. Starfsmenn verða þeirar á meðal.
Keppnin hefst á föstudag en mótið er formlega sett 20:00 á föstudagskvöld. Keppendum UÍA er bent á að mæta í UÍA fötum hálftíma fyrir setningarathöfnina. Starfsmenn verða með föt til taks fyrir þá sem ekki eiga UÍA galla eða boli.
Tímaseðlar einstakra greina hafa ekki verið birtir en von er á þeim á www.ulm.is undir 'Keppni' í kvöld og á morgun. Ef tími gefst munum við segja fréttir af framgangi okkar fólks á www.uia.is um helgina en við munum senda inn myndir og stutta punkta á Twitter (@umfausturlands).
Spáð er sól og blíðu á Selfossi föstudag og laugardag en skýjaðra og örlítið kaldara á sunnudag.
