Sumarhátíð 2012: Keppni 16 ára og eldri færð til og knattspyrnumótið fellur niður

Skrifað af Ritstjórn þann 06. júlí 2012.

Ákveðið hefur verið að færa keppni sextán ára og eldri frá föstudegi til laugardags og sunnudags. Ekki verður keppt í knattspyrnu á Sumarhátíð 2012. Ekki var næg skráning í þessar greinar fyrir auglýstan skráningarfrest til að hægt væri að stefna á óbreytta dagskrá.

Keppendur 16 ára og eldri í frjálsíþróttum munu keppa með 14-15 ára á laugardag og sunnudag. Með þessu fæst aukið hagræði þar sem starfsfólk nýtist til dæmis betur. Yngri keppendur fá fyrirmyndir og eldri keppendur keppa fyrir framan fleiri áhorfendur en verið hafa á föstudagskvöldunum. Þessi ráðstöfun var rædd og samþykkt innan frjálsíþróttaráðs UÍA í gærkvöldi.

Ekkert lið barst í knattspyrnukeppnina sem vera átti á laugardag áður en lokað var fyrir skráningar á miðnætti á fimmtudegi. Ekki eru nógu margir einstaklingar skráðir til að hægt sé að mynda lið til keppni.

Við biðjumst velvirðingar á þeim óþægindum sem þessar ráðstafanir kunna að hafa.