Frjálsíþróttaskólinn hafinn: Fyrsti dagurinn kryddaður með skylmingnum og júdói

Skrifað af Ritstjórn þann 12. júní 2012.

Frjálsíþróttaskóli UMFÍ var settur á Egilsstöðum eftir hádegið í gær. Að þessu sinni taka 22 krakkar af öllu Austurlandi þátt í skólanum.

Aldrei hafa fleiri mætt í skólann sem UÍA hefur haldið frá árinu 2008. Hildur Bergsdóttir, framkvæmdastýra er skólastjóri og stýrir flestum æfingum en ýmsir koma henni til aðstoðar. Þannig var Heiður Vigfúsdóttir til aðstoðar á spretthlaupsæfingu í gær.

Þótt skólinn beri frjálsíþróttanafnið hefur UÍA ávallt lagt áherslu á að kynna fleiri íþróttagreinar í skólanum sem stendur í viku. Í gær kenndu íþróttakennararnir Árni Ólason og Alda Jónsdóttir nemendunum grunnatriðin í júdói og skylmingum.

Fyrsta grein skólans að þessu sinni var samt langstökk. Stökkin voru mynduð og farið yfir upptökurnar á tæknifundi eftir kvöldmat.

Einnig er hægt að fylgjast með tíðindum úr skólanum á Twitter.