Sumarið fer vel af stað hjá frjálsíþróttafólki UÍA
Það er óhætt að segja að sumarstarfið hjá frjálsíþróttaráði UÍA sé hafið af krafti, en síðastliðinn sunnudag fór fram Meistaramót UÍA í frjálsum íþróttum fyrir 11 ára og eldri.
Mótið var haldið á Vilhjálmsvelli og voru aðstæður þar prýðilegar, þegar búið var að moka snjó af langstökksbraut og -gryfju!
Um 30 keppendur frá Hetti, Þristi, Þrótti og Leikni kepptu á mótinu og reyndu þar með sér í kúluvarpi, 60 m hlaupi, langstökki, hástökki og 600/800 m hlaupum.Veitt voru verðlaun fyrir þrjú fyrstu sæti í aldursflokkum stúlkna og pilta 11 ára, 12-13 ára, 14-15 ára og 16 ára og eldri. Víða var spennandi og skemmtileg keppni og það er ljóst að frjálsíþróttafólk á Austurlandi kemur vel undan vetri og hlakkar til viðburðarríks sumars. Þar er af nógu að taka en mótaröð UÍA og HEF hefst strax í næstu viku.
Fjögur mót eru í mótaröðinni en á þeim reyndu keppendur með sér í all flestum greinum frjálsra íþrótta og safna stigum í gegnum alla mótaröðina. Sex stig eru veitt fyrir 1. sæti, 5 stig fyrir annað sæti og þannig koll af kolli. Þeir hlutskörpustu í hverjum flokki voru verðlaunaðir í lok sumars. Öll mótin fara fram á Vilhjálmsvelli og keppt er í flokkum stúlkna og pilta 11 ára, 12-13 ára, 14-15 ára og 16 ára og eldri.
Mót í mótaröðinni verða:
30. maí. Kúluvarp, 200 m hlaup, þrístökk.
26. júní. 80/100/110 m grindahlaup, hástökk, spjótkast og 1500 m hlaup.
25. júlí. Langstökk, 80/100 m hlaup, kringlukast og 800 m hlaup.
22. ágúst. Sleggjukast, langstökk, 400 m hlaup og frjálsíþróttaflipp!
Þátttökugjöld á hvert mót er 500 kr óháð greinafjölda.
UÍA þakkar keppendum og starfsfólki á Meistaramóti UÍA kærlega fyrir daginn og hlakkar til að sjá ykkur aftur í næstu viku á fyrsta móti UÍA og HEF.
Úrslit Meistaramótsins má nálgast hér.
Á myndinni hér til hliðar má sjá verðlaunahafa í kúluvarpi stúlkna 12-13 ára; Jóhönnu Malen Skúladóttur, Þristi (2. sæti), Aðalheiði Sjöfn Helgadóttur, Hetti (1. sæti) og Heiðu Elísabetu Gunnarsdóttur, Þrótti (3. sæti).
