Svör við nafnaþulu úr Snæfelli
Í síðasta tölublaði Snæfells birtist eftirfarandi nafnaþula sem Jónína Zophoníasdóttir frá Mýrum lét okkur í té. Lesendur blaðsins voru hvattir til glíma gátuna og senda lausnir til skrifstofu UÍA. Nokkrir gerðu það en aðeins einn þátttakandi hafði öll nöfnin rétt, Kristjana Atladóttir frá Eskifirði og fær hún glaðning frá UÍA.
Hér má sjá gátuna ásamt lausnum.
Hugans fley úr höfn ég stefni.
Hásetana tólf ég nefni.
Situr fyrsti á efstu klettum Örn/Valur
annar sést í flestum stéttum Steinn
þriðja sá um þjóðbraut renna Vagn
og þann fjórða á mínum penna Oddur
fimmti ungan fær ei svanna Meyvant
finnst sá sjötti í skálpum granna. Brandur
Sjöundi oft á auðs manns borði Leifur
áttundi sitja á hræjum þorði. Hrafn
Níunda sá í austri sveima Dagur
á sá tíundi hvergi heima Gestur
Ellefti er und blómum borinn Ormur
bar ég hinn tólfta á sniðil skorinn. Skafti
Læt ég svo fleyið að landi beita
og lestu mér hvað þegnar heita.
Óskum við Kristjönu til hamingju og þökkum við öllum sem sendu inn svör og gáfu sér tíma til að velta vöngum yfir þessari gömlu og skemmtilegu þulu.
