SKÍS tekur við rekstri Skíðasvæðisins í Stafdal
Sveitarfélögin Fljótsdalshérað og Seyðisfjörður hafa samið við Skíðafélagið í Stafdal SKÍS um rekstur skíðasvæðisins. Miklar væntingar eru um skíðasvæðið til framtíðar enda býður umhverfið og landslagið upp á að þar verði mikil paradís fyrir vetraríþróttir – bæði fyrir keppnisfólk og almenna notendur.
Á síðustu árum hefur stóraukin samvinna skíðamanna á Héraði og á Seyðisfirði leitt til sameiningar skíðamanna undir nafninu SKÍS ( Skíðafélagið í Stafdal ). Samstarfið hefur leitt af sér mörg verkefni á sviði rekstrar skíðafélagsins, skíðasvæðisins og uppbyggingar á aðstöðu. Eitt verkefnið var flutningur skíðalyftu Fljótsdalshéraðs yfir í Stafdal, sem lauk á síðasta ári. Með flutningi lyftunnar opnast miklir möguleikar til skíðaiðkunar í Stafdal auk þess að vera einörð staðfesting þess samstarfs, sem nú er verið að innsigla.
Það er því ánægjulegt og eðlilegt framhald hjá sveitarfélögunum að fela SKÍS rekstur og uppbyggingu í Stafdal. Samstarfið á að efla alla starfsemi SKÍS og er mikið framfaraspor í vetraríþróttum á Austurlandi, bæði fyrir keppnisfólk og almenning auk þess að skapa tækifæri til eflingar ferðaþjónustu á Austurlandi.
Sala vetrarkorta er hafin og er tilvalin jólagjöf fyrir landsmenn alla. Sérstök tilboð eru til áramóta.
Stefnt er að opnun skíðasvæðisins þriðjudaginn 20. desember nk.
Allar nánari upplýsingar má finna á heimasíðu SKÍS : www.stafdalur.is , This email address is being protected from spambots. You need JavaScript enabled to view it. og hjá Agnari Sverrissyni rekstrarstjóra s. 898 2798.
