Stórgóð sundhelgi framundan

Skrifað af Ritstjórn þann 18. nóvember 2011.

Sundráð UÍA stendur fyrir Bikarmóti UÍA í sundi a morgunn laugardag, á Djúpavogi. Mótið er ætlað keppendum 17 ára og yngri og er stigakeppni milli félaga þar sem keppt er um sæmdarheitið Bikarmeistari Austurlands í sundi sem og bikar mótsins.

Í fyrra hampaði lið Neista bikarnum og titlinum góða og var auk þess með stigahæstu lið karla og kvenna. Sindri hafnaði í öðru sæti í heildarstigakeppninni. Nú verður spennandi að sjá hvernig leikar fara í ár.

Að móti loknu verða fyrsta æfing Úrvalshóps UÍA og Sindra í sundi, en hópnum er ætlað að hvetja og efla efnilega sundmenn á svæðinu til enn frekari dáða. Þegar sundgarpar hafa þerrað sig og nært verður blásið til kvöldvöku. Á sunnudeginum verða æfingabúðir fyrir allan aldur í umsjá þjálfara á Austurlandi.