Perlað fyrir Kraft
Kraftur, stuðningsfélag fyrir ungt fólk sem greinst hefur með krabbamein og aðstandendur, UÍA og Huginn Seyðisfirði standa fyrir perluviðburði í Upplýsingamiðstöð Seyðisfjarðar/Ferjuhúsinu laugardaginn 9.júní frá kl. 13-17.
Með því að taka þátt í viðburðinum geta Austfirðingar átt möguleika á að hreppa perlubikarinn en til þess þarf að perla meira en 2302 armbönd á fjórum tímum en það met settu Akureyringar og íþróttafélögin þar í byrjun maí.
Akureyringar náðu þá bikarnum af Eyjamönnum en skoruðu svo á UÍA og íþróttafélögin þar að reyna betur og ná af þeim metinu. Perlubikarinn hljóta þeir viðburðarhaldarar sem að ná að perla sem flest armbönd.
Armböndin sem um ræðir eru í fánalitunum þau eru seld til stuðnings Krafti og sýna einnig samstöðu með íslenska fótboltaliðinu á HM. Armböndin eru með áletruninni „Lífið er núna“ og eru auðveld í samsetningu svo að allir geta tekið þátt, börn sem fullorðnir.
Við hvetjum Austfirðinga til að taka þátt í þessu skemmtilega verkefni með okkur. Öll armböndin eru perluð í sjálfboðavinnu og því mikil hugsjón bakvið hvert armband. Allur ágóði af sölu armbandanna rennur til Krafts - stuðningsfélag fyrir ungt fólk sem greinst hefur með krabbamein og aðstandendur og er hægt að kaupa armböndin líka strax á staðnum.
Þetta er skemmtileg stund fyrir alla fjölskylduna og tilvalið tækifæri að láta gott af sér leiða og að sjálfsögðu verður heitt á könnunni!
KOMIÐ OG PERLIÐ AF KRAFTI ♥
Sjá á Facebook
