ULM kynning á aðalfundi Þróttar
Formaður og framkvæmdastýra UÍA sóttu aðalfund Þróttar í gærkvöldi og kynntu starfsemi UÍA og Unglingalandsmót UMFÍ sem fram fer á Egilsstöðum í sumar. Þróttarar eru svo sannarlega tilbúnir í ULM og stefna á myndarlega þátttöku.
Blómleg starfsemi er hjá Þrótti en sex deildir eru hjá félaginu; Blakdeild, frjálsíþróttadeild, knattspyrnudeild, skíðadeild, sunddeild og á síðasta ári bættist karatedeild við í flóru félagsins.
Síðastliðið ár hefur verið viðburðarríkt hjá Þrótti en félagið tók í notkun aðstöðuhús við Norðfjarðarvöll og í fyrsta skipti var úthlutað úr afrekssjóði Guðmundar Bjarnasonar sem styrktur er af SVN. Þróttur tók þátt í Íslandsmóti í hópgreinum með meistaraflokka karla og kvenna í blaki og knattspyrnu á árinu 2016. Þá er félagið með keppendur á Íslandsmóti yngriflokka í öllum flokkum í blaki og knattspyrnu, auk keppenda í einstaklingsgreinum eins og sundi og skíðum.
