Góður árangur í grunnskólamóti og sveitaglímu
Sautján nemendur frá Grunnskóla Reyðarfjarðar tóku þátt í Grunnskólamóti Íslands sem fram fór á Hvolsvelli laugardaginn 19. mars og stóðu sig með miklum ágætum. Þeir urðu aðrir í stigakeppni skóla á eftir Hvolsskóla og eignuðust fjóra grunnskólameistara, Þórð Pál Ólafsson, Birki Inga Óskarsson, Mörtu Lovísu Kjartansdóttur og Nikólínu Bóel Ólafsdóttur.
Að loknu grunnskólamóti fór fram bráðskemmtileg og fjörug sveitaglíma. Allar sveitir stóðu sig með mikilli prýði og ein sveitin, sveit 10 og 11 ára stráka, varð sveitaglímumeistari. Það var lærdómsríkt og skemmtilegt að hitta og fá að takast á við glímukrakka hvaðanæva af landinu. Allir voru ánægðir þegar heim var komið eftir langt ferðalag þar sem lífsgleðin og vináttan var í fyrirrúmi.
