Dagskrá Unglingalandsmótsins tilbúin
Dagskrá Unglingalandsmótsins sem verður á Egilsstöðum um verslunarmannahelgina er tilbúin. Sléttar tvær vikur eru í að hún byrji. Umfangsmikil skemmtidagskrá verður í bænum fyrir utan íþróttakeppnina.
Á meðal þeirra sem ætla að koma austur og skemmta gestum eru Bogomil Font, Ingó og veðurguðirnir, hljómsveitin Í svörtum fötum og Jón Jónsson. Heimamenn koma einnig myndarlega inn í dagskrána. DJ Ívar Pétur tryllir lýðinn, Bjartmar Guðlaugsson heldur uppi stuðinu í tjaldinu og Creedance Traveling Band tekur lagið.
Í dag eru sléttar tvær vikur í að dagskráin hefjist. Fimmtudaginn 28. júní verður tekið á móti gestum og haldin kvöldvaka í risatjaldinu sem staðsett verður við sundlaugina.
Fjölbreytt afþreying verður í boði á mótinu eins og ratleikir, gönguferðir, sögustundir fyrir yngstu börnin, leiktæki, íþróttaþrautir, spurningakeppni og fjölbreytt tónlistar og leikatriði.
