Neisti bregst fljótt og örugglega við fréttaáskorun
UMF Þristur sagði fyrir skemmstu frá starfi sínu og skoraði á UMF Neista að gera slíkt hið sama. Neistamenn voru ekki seinir á sér og hér er komin frétt frá þeim:
Hér fer á eftir samantekt um Ungmennafélagið Neista á Djúpavogi. Félagið var stofnað í febrúar árið 1919 og er því komið á tíræðisaldur. Á sinni löngu ævi hefur Neisti komið að hinum ýmsu verkefnum í hreppnum m.a. leiklist og skógrækt.
Um miðja síðustu öld var rekstur félagsheimilisins Neista mjög stór þáttur í starfsemi Ungmennafélagsins en þá voru haldin böll í félagsheimilinu nánast um hverja helgi. Ennfremur var þar boðið upp á íþrótta- og æskulýðsstarf við frumstæðari aðstæður, en finna má í nútíma félagsmiðstöðvum og íþróttahúsum.
Í dag snýst starfsemi Neista nánast eingöngu um börnin okkar hér í sveitarfélaginu. Í boði eru æfingar í fótbolta, sundi, frjálsíþróttum og öðrum íþróttagreinum. Mikið og gott samstarf er á milli Neista og skóla sveitarfélagsins, þar sem starf allra er stillt þannig saman að samfella er í degi barnanna og þau flest búin í skólanum, íþróttum og tónlist kl.15.
Börnin okkar eru mjög dugleg að nýta sér það sem í boði er og gaman er að segja frá því að af 47 börnum í grunnskólanum eru 44 sem æfa hjá Neista. Geri aðrir betur ! Í heildina eru 52 börn að æfa hjá Neista því elsta árgangi leikskólans býðst einnig að taka þátt. Flest barnanna æfa fleiri en eina grein og þó nokkur æfa allt sem í boði er!
Íþróttatengdir viðburðir á vegum Neista eru ófáir yfir árið. Helst bera að nefna sundmót Neista sem haldið er árlega í kringum sumardaginn fyrsta. Fótboltamót litlu skólanna var haldið hér í fyrsta skipti síðasta vor í samvinnu við Grunnskóla Djúpavogs. Mikil ánægja var með þetta mót og vonum við að það verði árlegt hér eftir. Neistadagurinn er lítið innanfélagsmót sem haldið er í lok sumars. Þar er keppt í frjálsum íþróttum, grillað og endað á liðakeppni í víkingaspilinu KUBB. Iðkendur Neista eru svo verðlaunaðir fyrir góða framistöðu á uppskeruhátið sem haldin er í byrjun árs. Þá hittumst við öll, sem erum í Neista, í íþróttahúsinu og leikum okkur saman, keppum í þrautabraut. Pabbar keppa í kúluvarpi, mömmur í spjótkasti og svo fá allir kaffi/svala og skúffuköku.
Annað starf og uppákomur á vegum Ungmennafélagsins er í nokkuð föstum skorðum og sterk hefð hefur myndast hér í þorpinu okkar fyrir því, sem Ungmennafélagið gerir fyrir samfélagið. T. d. hefur árleg Spurningakeppni Neista verið í gangi í tugi ára (með stuttum hléum þó). Þar keppa fyrirtæki staðarins í skemmtilegri spurningakeppni þar sem getur reynt á ýmsa hæfileika keppenda. Í samstarfi við Slysavarnarfélagið Báru sér Neisti um skemmtun á 17. júní. Jólabingó Neista er ómissandi í desember og rauðklæddir sveinar á vegum félagsins færa þægum börnum pakka á aðfangadag. Aðrar fjáraflanir eru t.d. sala á ýmsum varningi.
Á síðasta ári brydduðum við svo upp á þeirri nýbreytni að halda skautadag fjölskyldunnar. Við erum nefninlega svo heppin hér á Djúpavogi að eiga besta skautasvell landsins (gert af náttúrunnar hendi) ! Stjórn Neista útbjó þessar fínu skautabrautir á svellið, dröslaði borðum á svæðið , ásamt grilli. Óhætt er að segja að þetta hafi heldur betur slegið í gegn og talið er að um 80 manns á öllum aldri hafi verið að skauta á svæðinu þegar mest var. Þess á milli var sest niður að spjalla og borða grillaðar kræsingar. Stefnt er að því endurtaka þetta (ef veðurguðirnir lofa) um næstu helgi og skorum við á alla að koma til okkar og prófa besta skautasvæði Íslands.
Hægt er að fylgjast með á heimasíðunni okkar www.djupivogur.is/neisti
Að lokum langar okkur að þakka öllum þeim sem taka þátt í að styrkja starfsemi Neista með einum eða öðrum hætti. Þúsund þakkir .
Við skorum á vini okkar í Umf. Leikni að segja okkur fréttir úr þeirra starfi.
Djúpavogi í mars 2011;
F.h. Umf. Neista;
Sóley Birgisdóttir, formaður.
