Sprettur Sporlangi skal dýrið heita

Skrifað af Ritstjórn þann 13. júlí 2011.

Nýtt lukkudýr UÍA var kynnt til sögunnar á 70 ára afmælishátíð sambandsins um seinustu helgi. Þar voru jafnframt kynnt úrslit úr nafnasamkeppni en dýrið hlaut heitið Sprettur Sporlangi.

Það var Þula Guðrún Þórunnardóttir sem stakk upp á nafninu sem varð fyrir valinu. Sprettur Sporlangi er afrekshreindýr og Fljótsdalsheiðarmethafi í langstökki og kúluvarpi, svo dæmi séu nefnd.

Sprettur aðstoðaði við verðlaunaafhendingu á bæði afmælishátíðinni og í frjálsíþróttakeppni Sumarhátíðarinnar og naut mikillar hylli, einkum hjá yngri kynslóðinni.