Bólholtsbikarinn, utandeildarkeppni í körfuknattleik
Körfuknattleiksráð UÍA efnir til, utandeildarkeppni í körfuknattleik, Bólholtsbikarsins. Um er að ræða keppnisfyrirkomulag sem svipar mjög til Launaflsbikarsins í knattspyrnu. Keppnin er ætluð hópum á starfssvæði UÍA og er hugsuð fyrir leikmenn sem ekki spila körfubolta að staðaldri með Meistaraflokki á Íslandsmótum. Leikið verður i umferðum og munu keppnislið spila bæði heima og heiman. Leiktími er 4x10 mínútur. Sigursælasta liðið í lok keppni hlýtur Bólholtsbikarinn en einnig verða veitt verðlaun fyrir stigakóng keppninnar. Ráðgert er að keppnin hefjist um miðjan febrúar.
Skráningarfrestur liða er til 1. febrúar og skulu skráningar berast til UÍA, Tjarnarási 6, 700 Egilsstaðir eða á This email address is being protected from spambots. You need JavaScript enabled to view it.. Skráningargjöld eru 15.000 kr á lið.
Skráningareyðublöð má nálgast hér
Eins og sjá má á skráningarblöðum eru liðin beðin að tilgreina heimavöll. Gerðar verða ákveðnar tilslakanir á stærðum keppnisvalla og kröfum um útbúnað (s.s. skotklukkur) en UÍA áskilur sér rétt til að hafna keppnisvöllum, þykir þeir óhentugir.
Lið eru beðin að tilgreina tvo dómara sem tiltækir geta verið í dómgæslu á heimaleikjum liðsins. Æskilegt er að dómari hafi dómararéttindi en að öðrum kosti sé nýttur traustur einstaklingur sem hefur góða þekkingu á íþróttinni. UÍA greiðir þóknun fyrir dómgæslu. Heimalið hverju sinni þarf einnig að útvega stigavörð og ritara.
Liðum ber að leika í samlitum búningum með númeri en hvorki gerð krafa um að þeir séu dýrir né glæsilegir.
Fulltrúar liðanna mega eiga von á að vera boðaðir á fund í byrjun febrúar þar sem reglur keppninnar verða ræddar og útfærðar nánar.
