Daði Fannar íþróttamaður Hattar
Íþróttafélagið Höttur sá um framkvæmd Þrettándagleði Fljótsdalshéraðs í gær. Veður og vindar settu nokkuð strik í dagskrána og var hún flutt inní íþróttahúsið. Á Þrettándagleðinni verðlaunar Höttur jafnan þá íþróttamenn sem þótt hafa skarað fram úr á árinu. Björn Ingimarsson bæjarstjóri ásamt Davíð Þór Sigurðarsyni formanni Hattar sáu um afhendinguna.
Íþróttamaður Hattar 2010 var Daði Fannar Sverrisson, frjálsíþróttamaður. Daði Fannar er efnilegur íþróttamaður sem stundar íþrótt sína af samviskusemi og dugnaði. Hegðun hans og framkoma er til fyrirmyndar jafnt í keppni sem og á æfingum. Hann er ávallt einbeittur og jákvæður og tekur sigrum jafnt sem ósigrum af yfirvegun.
Daði varð Íslandsmeistari og Unglingalandsmótsmeistari í spjótkasti 14 ára drengja á árinu 2010, ásamt því að komast í Úrvalshóp FRÍ í sleggjukasti og á jafnframt sæti í Úrvalshópi UÍA. Vann hann einnig til ferna annarra verðlauna á Meistaramóti Íslands í frjálsum íþróttum.
Daði var einnig valinn frjálsíþróttamaður Hattar þriðja árið í röð.
Í öðrum greinum voru eftirtaldir einstaklingar fyrir valinu þetta árið:
Blakmaður: Oddný Freyja Jökulsdóttir
Fimleikamaður: Valdís Ellen Kristjánsdóttir
Knattspyrnumaður: Stefán Eyjólfsson
Körfuboltamaður: Andrés Kristleifsson
Sundmaður: Trausti Dagbjartsson.
Að lokinni verðlaunaafhendingu var glæsileg flugeldasýning sem Björgunarsveitin á Héraði sá um.
Íþróttafélagið Höttur vill þakka eftirtöldum styrktaaðilum fyrir stuðninginn við framkvæmd Þrettándagleði 2010; Miðás, Hitaveitu Egilsstaða og Fella, Landsbanka Íslands, Verkís og Mannviti.
Óskum við þessu efnilega íþróttafólki Hattar til hamingju með útnefningarnar.
