Farandþjálfun UÍA sumarið 2009
UÍA býður aðildarfélögum sínum að nýta sér farandþjálfun á vegum sambandsins í sumar.Um verkefnið
Farandþjálfunin felst í því að áhugasöm félög innan UÍA geta leigt þjálfara til umsjónar með sumarnámskeiðum aðildarfélaga. Farandþjálfarinn sér um eina æfingu í viku á hverjum stað og sér um skipulag allra æfinga. Til að hægt sé að halda fleiri en eina æfingu í viku sér félagið um að útvega starfsmann eða sjálfboðaliða til að halda utan um þær æfingar (1-2 að auki) í samráði við og undir yfirstjórn farandþjálfara.
Möguleiki er á að æfingar verði í einni íþróttagrein eða fleirum, með eða án aldursskiptingar, eða að haldið verði blandað íþróttanámskeið yfir sumarið þar sem teknar yrðu fyrir fleiri greinar á einu námskeiði (t.d. 1 íþróttagrein í viku).
Æfingatíminn er áætlaður frá byrjun júní og fram í miðjan ágúst að undanskilinni vikunni 20. - 24. júlí, en þá fer fram Frjálsíþróttaskóli UMFÍ á Egilsstöðum. Kostnaður félaga yrði á bilinu 50.000.- til 70.000.- sem ræðst af fjölda þátttökufélaga.
Þjálfunin er tilvalinn möguleiki fyrir félögin til undirbúnings fyrir sumarhátíð UÍA 3. - 5. júlí og unglingalandsmót UMFÍ sem haldið verður Sauðárkróki um verslunarmannahelgina, 31. júlí – 3. ágúst.
Nánari upplýsingar um verkefnið fást á skrifstofu UÍA eða í síma 471-1353
Þjálfarinn
Farandþjálfari UÍA er Ólafur Sigfús Björnsson íþróttafræðingur.
Ólafur er útskrifaður frá Kennaraháskólanum á Laugarvatni vorið 2008. Hann hefur starfað við þjálfun frjálsra íþrótta og knattspyrnu barna og unglinga, auk þess að hafa verið starfandi einkaþjálfari síðastliðin 2 ár. Ólafur var á liðnu sumri umsjónarmaður Frjálsíþróttaskóla UMFÍ á Egilsstöðum.
