Formaður UÍA fékk viðurkenningu fyrir æskulýðsstarf
Gunnar Gunnarsson, formaður UÍA, hlaut nýverið viðurkenningu á vefum æskulýðsráðs fyrir starf sitt en verðlaunin voru þá afhent í fyrsta sinn.
Veittar voru viðurkenningar í þremur flokkum. Viðurkenning Gunnars var til ungs fólks sem lagt hefur alúð við þátttöku sína í æskulýðsstarfi eða nýtt reynslu síðan úr því á öðrum sviðum þjóðlífsins.
Í rökstuðningi ráðsins segir að Gunnar hafi komið „víða við í margskonar félagsstarfi innan íþrótta- og æskulýðshreyfingarinnar, tekið virkan þátt í æskulýðsstarfi á Austurlandi – í sinni heimabyggð, á landsvísu og í norðurlandasamstarfi. Auk þess hefur hann verið virkur í félagslífi á öllum skólastigum og gengt trúnaðarstörfum fyrir félagasamtök.“
Gunnar hefur verið formaður UÍA frá árinu 2012 en hann tók sæti í stjórn sambandsins árið 2005. Áður var hann formaður UMF Þristar frá 2004-2007.
Gunnar á einnig sæti í stjórn Ungmennafélags Íslands og hefur setið í ýmsum nefndum á vegum samtakanna, meðal annars varastjórn norrænu samtakanna NSU frá 2012-2014.
Í rökstuðningi ráðsins var bent á að Gunnar hefði einnig tekið þátt í störfum nemendafélaga og stjórnmálastarfi og nýtt þekkingu sína úr ungmennafélagsstarfi í atvinnulífinu.
Viðurkenning fyrir nýsköpun eða þróun í æskulýðsstarfi féll í skaut Hins hússins fyrir Músiktilraunir, sem í gegnum tíðina verið einn aðalvettvangur ungs fólks til að koma tónlist sinni á framfæri.
Þá hlaut Ólafur Proppé viðurkenningu fyrir ævistarf. Hann var prófessor og síðar rektor við Kennaraháskóla Íslands, hefur sinnt fjölmörgum trúnaðar- og forustustörfum fyrir skátahreyfinguna frá unga aldri og verið í forustu björgunarmála á Íslandi.
