Flott keppni á Austurland Open

Skrifað af Ritstjórn þann 19. maí 2014.

Fyrsta opna Austurlandsmótið í bogfimi var haldið 17. maí í Fjarðabyggðarhöllinni á Reyðarfirði.

Bæði austfirsku skotfélögin þ.e. Skotfélag Austurlands og Skotfélagið Dreki, hafa komið bogfimideildum á laggirnar innan sinna vébanda.

Ríflega tuttugu keppendur víðsvegar að af landinu skráðu sig til leiks en auk heimamanna í Skaust og Drekanum mættu keppendur frá Boganum, ÍFR, Eflingu og UMF Tindastól.

Keppt var í sveigbogaflokki og trissubogaflokki og má sjá úrslitin hér.

Þó skammt sé síðan að austfirðingar hófu að munda boga, þá er greinin í örum vexti og hefur okkar fólk náð góðum árangri á landsvísu. Nú í lok apríl fór fram Íslandsmót í bogfimi í Kópavogi, þar skipuðu félagar frá Dreka sér í öll þrjú verðlaunasætin í byrjendaflokki trissuboga Friðrik Fjalarson hreppti gullið, Njáll Andersen Pétursson tók silfrið og Helgi Rafnsson bronsið. Jón Gunnarsson frá Skaust sigraði í byrjendaflokki sveigboga.

Meðfylgjandi myndir eru af keppni og verðlaunaafhendingu á Austurland Open og eru fengnar af heimasíðum Dreka og Skaust.