Eva Dögg Jóhannsdóttir íþróttamaður UÍA 2014
Eva Dögg Jóhannsdóttir, glímukona úr Val á Reyðarfirði, var á sambandsþingi UÍA, útnefnd íþróttamaður UÍA 2014. Á árinu sigraði hún meðal annars í -65 kg flokki kvenna og varð í 2.sæti í opnum flokki í Landsflokkaglímu Íslands og í öðru sæti í glímunni um Freyjumenið. Hún keppti erlendis á Hálandaleiknum þar sem hún sigraði í opnum flokki kvenna í backhold. Vert er að geta þess að Eva Dögg æfir einnig frjálsíþróttir. Hún er metnaðarfullur íþróttamaður og reiðubúin að gefa af sér til yngri iðkenda en hún bæði dæmir og þjálfar glímu.
Eva Dögg gat því miður ekki sótt þingið og tekið við bikarnum þar sem hún stóð í ströngu í keppni á Íslandsglímunni sem fram fór á Reyðarfirði sama dag. Þar sigraði Eva Dögg Freyjumenið og hlaut einnig Rósina fyrir fallegustu glímurnar.
Við óskum Evu Dögg innilega til hamingju með titilinn og árangurinn í Íslandsglímunni.
