Skottast um skóg og sullaði í sólinni á þriðja degi Frjálsíþróttaskólans
Frjálsíþróttaskólakrakkarnir slógu ekki slöku við í dag frekar en aðra daga. Af mannúðarástæðum var þó fell niður morgunleikfimi sem fara átti fram í bítið, enda mannskapurinn ansi stirður og lúinn eftir keppni gærkvöldsins. Engu að síður mætti hópurinn út á Vilhjálmsvöll glaðbeittur kl 9:00 á æfingu þar sem lögð var áhersla á liðleikaþjálfun auk þess sem Lovísa Hreinsdóttir kenndi spjótkast og Hildur kringlukast.
Eftir hádegismat lá leiðin inn í Hallormsstaðaskóg, þar sem sólin lék við hvurn sinn fingur og fuglarnir sungu við raust. Hópurinn fór á hestbak og þrátt fyrir að sumir væru ögn smeykir við farskjótana í fyrstu skelltu sér allir á bak, losnuðu fljótt við skrekkinn og nutu þess að tölta um skóginn. Eftir að hafa gætt sér á nesti var rölt inn í Atlavík þar sem við tóku bátsferðir og allsherjar sull í sólinni. Grillaðir sykurpúðar og bananar með súkkulaði runnu ljúflega niður í lok skógarferðarinnar. Þegar heim var komið og búið að gera kvöldmatnum góð skil, hélt hópurinn í Bjarnadalinn þar sem Kristbjörg Jónasdóttir kenndi undirstöðu atriði í strandblaki og því næst var spilað strandblak og ringó af hjartans lyst. Það var sólbakaður og sællegur hópur sem buslaði í sundlauginni í kvöldsólinni og lét líða úr sér eftir viðburðarríkan dag.
Myndir dagsins má finna á facebooksíðu UÍA
